දිනේෂ් චන්දිමාල් යුධ හමුදාවට එක්වෙයි

ශ්‍රී ලංකා යුධ ක්‍රිකට් කණ්ඩායමේ හිටපු නායක දිනේෂ් චන්දිමාල් කොමිෂන්ලත් නිලධාරියෙක් ලෙස යුධ හමුදාවට එක්වීමට නියමිත බව මාධ්‍ය ප්‍රකාශක මේජර් ජනරාල් සුමිත් අතපත්තු ප්‍රකාශ කර සිටිනවා. ශ්‍රී ලංකා යුධ හමුදාවේ ක්‍රිකට් කණ්ඩායම නියෝජනය කිරීමේ අදහසින් දිනේෂ් චන්දිමාල් විසින් මෙලෙස කොමිෂන්ලත් නිලධාරියෙක් ලෙස යුධ හමුදාවට එක්වනු ඇති බවත් ඊට ආරක්ෂක අමාත්‍යාංශයේ අනුමැතිය හිමිවී ඇති බවයි යුධ හමුදා මාධ්‍ය ප්‍රකාශකවරයා මෙහිදී වැඩිදුරටත් සඳහන් කර සිටියේ.

යුධ හමුදාවට දිනේෂ් චන්දිමාල් සිය කැමැත්ත පළකර ඇති බවයි යුධ හමුදා මාධ්‍ය ප්‍රකාශකවරයා මෙහිදී වැඩිදුරටත් සඳහන් කර සිටියේ. ඒ අනුව දිනේෂ් චන්දිමාල් නුදුරේදීම යුධ හමුදා සම්මුඛ පරීක්ෂණයට මුහුණ දීමට නියමිතව ඇත. ලොකුගේ දිනේෂ් චන්දිමාල් උපත 18 නොවැම්බර් 1989) යනු වෘත්තිමය ශ්‍රී ලාංකික ක්‍රිකට් ක්‍රීඩකයෙක් සහ ශ්‍රී ලංකාව වෙනුවෙන් හිටපු සීමිත ඕවර නායකයාද වෙයි. දක්ෂ සහ ජව සම්පන්න දකුණතින් පිත්ත හසුරුවන යෙදෙන පිතිකරුවෙකු වන මොහු සියළු ආකෘතින්හී කඩුළු රකින්නා වෙයි. හේ දැනට ටෙස්ට්, එදිජා සහ වි20ජා යන සියළු ආකෘතින්හී උප නායකයාද වෙයි.

2012 අයිසීසී ලෝක විස්සයි20 තරගාවලියෙහි දෙවැනි තැනගත් කණඩායමෙහි සහ 2014 අයිසීසී ලෝක විස්සයි20 තරගාවලියෙහි ජයග්‍රාහක කණ්ඩායමෙහි චන්දිමාල් ප්‍රධාන කාර්යභාරයක් ඉටු කල ක්‍රීඩකයෙක් විය. 2014 අයිසීසී ලෝක විස්සයි20 තරගාවලියෙහි පළමු කාණ්ඩයෙහි තරග තුලදී ඔහු ශ්‍රී ලංකා කණ්ඩායමට නායකත්වය සැපයූ නමුදු , මඳ ඕවර සීඝ්‍රතාවය නිසා ඔහුට තරග තහනමක් පැනවුණු අතර ඉනික්බිතිව තරගාවලියෙහි සෙසු තරග සඳහා කණ්ඩායමෙහි ඔහුගේ ස්ථානයද ඔහුට අහිමි විය. නිත්‍ය නායකයා නොමැති විටෙක චන්දිමාල් බොහෝ විටෙක වි20ජා නායකයා ලෙසින් පත් කෙරෙයි.

ගැටවරයෙකු ලෙසින් චන්දිමාල් ඔහුගේ ක්‍රිකට් අභිවෘත්තිය ඇරඹුවේ ඔහුගේ පළමු පාසැල වූ අම්බලන්ගොඩ, ධර්මාශෝක විද්‍යාලයෙනි. පසුව ඔහු අධ්‍යාපනය සඳහා කොළඹ, ආනන්ද විද්‍යාලයට ඇතුළු වූ අතර, එහිදී වයස-17 න් පහළ කණ්ඩායමට නායකත්වය සැපයීය. 2008 වසරෙහිදී, විදුහලෙහි මුල් පෙළ ක්‍රිකට් කණ්ඩායමෙහි නායකයා වශයෙන් පත් කෙරුණු ඔහු, එම තරග වාරයෙහිදී විදුහලට එකහෙළා ජයග්‍රහණ 13 ක් හිමි කර දෙමින්ශ්‍රී ලංකා පාසැල් ක්‍රිකට් ඉතිහාසයේ නව සටහන් තැබීය. මුළු ලකුණු 1,580 ක් සහිතව 1,000 ලකුණු ගණන අභිබවා ගිය පළමු පාසැල් ක්‍රිකට් ක්‍රීඩකයා වූ අතර, 2009 වසරෙහිදී වසරෙහි පාසැල් ක්‍රිකට් ක්‍රීඩකයා සම්මානය හිමි කර ගති. පාසැලෙන් ඉවත්වූ පසු, ඔහු නොන්ඩෙස්ක්‍රිප්ට්ස් ක්‍රිකට් සමාජය හා එක් විය

ට්‍රම්ප් සමග සිටින දියණිය

ඇමෙරිකා ජනාධිපති ඩොනල්ඩ් ට්‍රම්ප් 16 හැවිරිදි ස්වීඩන ජාතික ග්‍රෙටා තොන්බර්ග් සමච්චල් කිරීමට උත්සාහ ගෙන ඇතැයි ඇමෙරිකන් පුවත් සේවා වාර්තා කරයි. පසුගිය 23 වැනිදා එක්සත් ජාතීන්ගේ මහා මණ්ඩල සැසියට සමගාමීව, නිව්යෝක් නුවර එක්සත් ජාතීන්ගේ මූලස්ථානයේ දේශගුණික වෙනස්වීම් සම්බන්ධයෙන් විශේෂ රාජ්‍ය නායක හමුවක් පැවැත්විණි.

හමුව කැඳවා තිබුණේ එක්සත් ජාතීන්ගේ මහ ලේකම් ඇන්තෝනියෝ ගු​ටරේට්ස්ය. ඇමෙරිකාවට පැමිණ සිටින ග්‍රෙටා ඊට සහභාගී වී, ආවේගශීලීව සහ හැඟීම්බරව අදහස් ප්‍රකාශ කළාය. එම අවස්ථාවට ට්‍රම්ප් ද සහභාගී විය. ඒ ගැන ග්‍රෙටාගේ ප්‍රසාදයක් නොතිබුණි. ඇමෙරිකා ජනාධිපති ඩොනල්ඩ් ට්‍රම්ප්, පරිසරය ගැන තැනීමක් කරන අයකු නොවන බව පැවැසෙයි. දේශගුණික විපර්යාසවලට හේතුව මිනිස් ක්‍රියාකාරකම් යැයි ට්‍රම්ප් විශ්වාස ​කරන්නේ නැත.

රාජ්‍ය නායක සමුළුව අවසන් වීමෙන් පසු ට්‍රම්ප් ට්විටර් පණිවුඩයක් හරහා ග්‍රෙටා ගැන අදහස් දැක්වීය. ‘ඇය හරිම සතුටින් සිටින ලස්සන මෙන්ම සුන්දර අනාගතයක් ඇති දැරියක්. ඇය දකින්න ලැබීම සතුටක්’ යනුවෙනි. මීට ප්‍රතිචාර දක්වමින්, ග්‍රෙටා ඇගේ ට්විටර් ගිණුමට ට්‍රම්ප්ගේ මෙම වදන් පෙළ එක් කළාය. ඒ, ට්වටර් ගිණුමේ ඇය කවුරුන්දැයි හඳුන්වාදීමටය. ‘මම හරිම සතුටින් සිටින දැරියක්, ලස්සන මෙන්ම සුන්දර අනාගතයක් ඇති.’ යැයි ග්‍රෙටා සිට ට්විටර් ගිණුම හරහා පවසා තිබේ. (රොයිටර්ස්) – ලංකාදීප

ගුවන් යානයකින් ආපු තාත්තයි පුතයි

ශ්‍රී ලාංකික සිවිල් ගුවන් සේවා ඉතිහාසයේ සුවිශේෂී කඩඉම් ලක්ෂයක් සනිටුහන් කරමින් , පියා සහ තම පුතා විසින් ගුවන් යානයක් පදවාගෙන තම මව්බිමට පැමිණි පුවතක් ගුවන්තොටුපොලෙන් වාර්තා වනවා. උදිත දන්වත්ත , මෙම ආදරණීය පියා ප්‍රධාන ගුවන් නියමුවා ලෙසත් , ඔහුගේ ආදරණීය එකම පුත් කවීෂ දන්වත්ත සහායක නියමුවා ලෙසත් කටයුතු කරමින් , මැලේසියාවේ ක්වාලාලම්පූර් නුවර සිට පැමිණි එයා ඒෂියා ගුවන් සේවයට අයත් ඒ.කේ.- 047 දරන ගුවන් යානය පදවාගෙන 9/24 දින රාත්‍රී 9.45 ට කටුනායක බණ්ඩාරනායක ජාත්‍යන්තර ගුවන් තොටුපළ වෙත පැමිණියහ .

ඔවුන් දෙදෙනා පිළිගැනීමට උදිතගේ ආදරණීය බිරිඳ මෙන්ම , කවීෂගේ ආදරණීය මව ද ගුවන් තොටුපළ වෙත මල් මිටක් ද රැගෙන පැමිණ සිටියාය. මෙහිදී ඔවුන් පදවාගෙන පැමිණි ගුවන් යානයෙන් බැසගත් මෙම පිය පුතු ගුවන් නියමුවන් දෙදෙනා , ගුවන් තොටුපළ පර්යන්ත ගොඩනැගිල්ලට පැමිණ , එහි සිටි මාධ්‍යවේදීන් වෙත සිය අදහස් මෙසේ දැක්වීය .

එහිදී උදිත දන්වත්ත මහතා මෙසේ පැවසීය . මට මේ ගුවන් ගමන ඉතාමත් සුවිශේෂී එකක් . මම මගේ පුතාත් එක්ක මැලේසියාවේ ක්වාලාලම්පූර් නුවර සිට කටුනායක ගුවන් තොටුපළ වෙත එයා ඒෂියා ගුවන් යානය පදවාගෙන පැමිණියා . එහිදී මගේ සහායක ගුවන් නියමුවා ලෙස කටයුතු කළේ මගේ ආදරණීය එකම පුතා , කවීෂ දන්වත්ත .

මේක අපි බලාපොරොත්තු වූ සිහිනයක් .මේ අවස්ථාව ශ්‍රී ලාංකිකයන්ට සතුටු වෙන්න පුළුවන් අවස්ථාවක් . ආඩම්බර වෙන්න පුළුවන් අවස්ථාවක් .මෙහිදී අදහස් දැක්වූ සහායක ගුවන් නියමු කවීෂ දන්වත්ත . මේක මගේ කුඩා කාළයේ පටන්ම පැවති සිහිනයක් . මට අවුරුදු 22 කට පසුව ඒ සිහිනය සැබෑ කර ගන්නට පුළුවන් උනා.

ඉතිං මට මේ තත්වයට එන්නට උදව් කළ මගේ ආදරණීය දෙමාපියන්ට , ගුරුවරුන්ට මේ අවස්ථාවේ මම ස්තුතිය පුද කරනවා. මෙම පිය පුතු දෙපළ විසින් පදවාගෙන පැමිණි එයා ඒෂියා ගුවන් යානය යළිත් රාත්‍රී 10.55 ට කටුනායක බණ්ඩාරනායක ජාත්‍යන්තර ගුවන් තොටුපළෙන් මැලේසියාවේ ක්වාලාලම්පූර් නුවර බලා පිටත්ව ගියහ. ටී.කේ.ජී.කපිල

ගුවන් යානා හදන ලංකාවේ පවුල

විනෝදාංශයක් ලෙස පියාසැරි යානා තනන පරම්පරා තුනක සාමාජිකයන්ගෙන් යුතු පවුලක් ගැන මීගමුව ප්‍රදේශයෙන් අසන්නට ලැබිණි. එහෙත් ඔවුන් තැනූ එක් අයකුට පමණක් පියාසර කළ හැකි සැහැල්ලු ගුවන් යානය පා3ස්කු ඉරිදා ප්‍ර1හාරයෙන් පසු නිවසේ කාමරයක දමා දොරගුළු ලා තිබේ. තවත් ආරක්ෂිත කාමරයක හා ඔවුන්ගේ පර් යේෂණ කාමරය තුළ දුරස්ථ පාලක මගින් ක්‍රියාකරන, ඔවුන් විසින්ම නිර්මාණය කරන ලද කුඩා ගුවන් යානා ආකෘති [Model aircraft] ගබඩා කර ඇත. දරු මුණුබුරන්ට පෙනෙන්නට පමණක් ඔවුන්ගේ නිවස පිහිටි සීමාවේ ඉතා පහතින් එම කුඩා යානා ඉඳහිට පියාසර කරවීමට දැන් ඔවුන්ට සිදුව තිබේ. මේ පවුලේ සාමාජිකයන් සතුව ගුවන් යානා තාක්ෂණය හා අනෙකුත් නව නිපැයුම් අත්හදා බලන්නට වෙන්කළ පර් යේෂණ කාමරයක් ඇත. බොහෝ දෙනෙකුගේ ඇස නොගැටුණු එය අංකුර නිර්මාණකරුවන්ට උත්තේජනය සපයන ස්ථානයකි. ශ්‍රී ලංකාවේ වැඩිම ගුවන් යානා ආකෘති සංඛ්‍යාව තමන් සතු බව කියන මේ පවුලේ ප්‍රධානියා එඩ්වඩ් පෙරේරාය. ඔහු මෙන්ම වැඩිමහල් පුත්‍රයා වන කොලින් පෙරේරා පෞද්ගලික ගුවන් නියමු බලපත්‍රය ලබාගෙන තිබෙන්නේ එකම දිනකය. ඔහුගේ අනෙක් පුත්‍රයා වන අමිත් පෙරේරා සහ මුණුපුරෝද විනෝදාංශයක් ලෙස ගුවන් යානා තාක්ෂණය අත්හදා බලමින් සිටිති. මේ පවුලේ එකම දියණිය මෘදුකාංග ඉංජිනේරැවරියක වන මිහිකා පෙරේරාය. ඇය පියාට සහ සොහොයුරන්ට ගුවන් යානා සැලසුම් කිරීමේදී මතු වන තාක්ෂණික ගැටලු නිරාකරණය කර දෙන්නීය.

සිය විනෝදාංශය නිසා මොවුන් පොලිස් අත්අඩංගුවට පත්වූ අවස්ථා ද තිබේ. “නීති නොදන්නා නිසා ඇතැම් නිලධාරීන්ගෙන් අපට අනන්තවත් හිරිහැර වෙලා තිබෙනවා. හත් අට වතාවක් මාව පොලීසියෙන් අත්අඩංගුවට ගත්තා. අන්තිමට නීතිපති දෙපාර්තමේන්තුව කියලා තිබුණ මෙයා නීතියට අනුව වරදක් කරල නෑ කියලා…” යනුවෙන් එඩ්වඩ් පෙරේරා බීබීසී සිංහල සේවයට පැවසුවේය. මීගමුව නගරය ආසන්නයේම කර්මාන්ත ශාලාවක ඇතුළු කාමරයක එඩ්වඩ්ගේ පරීක්ෂණාගාරය පිහිටා තිබේ. යන්ත්‍ර සූත්‍ර පසුකර ගොස් එම කාමරයට ඇතුළු වනවිට ඇති වූයේ කුතුහලය පිරි හැඟීමකි. එඩ්වඩ් පවුලේ සාමාජිකයන් අතින් නිර්මාණය කෙරුණු ආකෘති ගුවන් යානා බොහොමයක් පරීක්ෂණ කාමරය තුළ දක්නට ලැබේ. එමෙන්ම ගුවන් යානා ආකෘති නිර්මාණය පිළිබඳ නවීන තාක්ෂණික දැනුම සහිත ලොව ප්‍රකට සඟරා, නව නිර්මාණවලට අදාළ ඉංජිනේරු සැලසුම් මෙන්ම විවිධ ක්ෂේත්‍රවලට අයත් නව නිපැයුම් එහි දක්නට ලැබේ. ඒ අතරින් ගුවන් හමුදාවේ හිටපු ප්‍රධානීන් සමඟ එඩ්වඩ් ගත් ඡායාරූප පෙළක් දෙස අපගේ නෙත් යොමු විය. ඒ ගැන විමසීමේදී එඩ්වඩ් පෙරේරා පැවසුවේ එම ඡායාරූප තමන්ගේ මෙම පරීක්ෂණ කාමරයේ පමණක් ප්‍රදර්ශනය කර ඇති අතර ඒ ගැන මෙතෙක් කිසිදු මාධ්‍යයකට හෙළි නොකළ රහසක් පළමුවරට බීබීසී සිංහල සේවය ඔස්සේ හෙළි කරන බවය.

“යුද්දේ කාලේ මට අවස්ථාවක් ලැබුණා මිනිසුන් රහිත ගුවන් යානාවක් හදලා දෙන්න ගුවන් හමුදාවට. ඒ අවස්ථාවේ ගත්ත ඡායාරෑප තමයි ඔය තියෙන්නේ. මම මේ වෙනුවෙන් කිසිදු මුදලක් ගත්තේ නෑ. ඒක ඉතා රහසිගතව සිද්ධ වුණු දෙයක්. මේක දැන් කියන්න තහංචියක් නෑ කියලා මම විශ්වාස කරනවා,” යනුවෙන් ඔහු ප්‍රකාශ කළේය. එඩ්වඩ් පවසන ආකාරයට 2000 වසරේදී එම යානය ගුවන් හමුදාවට භාර දී තිබේ. මේ වනවිට 73 වැනි වියේ පසුවන එඩ්වඩ් පෙරේරා මීගමුව මාරිස්ටෙලා විද්‍යාලයේ ආදි සිසුවෙකි. එකල ඔවුන්ගේ නිවාස පිහිටියේ කටුනායක ගුවන්තොටුපළ ආසන්නයේය. එවක එය ජාත්‍යන්තර ගුවන් තොටුපළක් නොවූවද රාජකීය ගුවන් හමුදාවේ සංදර්ශන නැරඹීමට 1958 දී පමණ කාලයක සිට තමන් එහි ගිය බව එඩ්වඩ් පවසයි. ඒ හරහා ගුවන් යානා පිළිබඳ ආශාවක් ඇති වන්නට පසුබිම සැකසී ඇත. පියා ගෘහ කර්මාන්තයක් ලෙස රතිඤ්ඤා නිෂ්පාදනය කළ අතර රතිඤ්ඤා එතීමට අවශ්‍ය කොළ රැගෙන ඒමට දිනක් එඩ්වඩ් නිවසින් පිටත්ව ගිය අතරේ ඔහුට ගුවන් යානාවල ඡායාරූප ඇතුළත් සඟරා කිහිපයක් හමුවී තිබේ. ඒ සඟරාවලට ඇති වූ ආශාව නිසා ඒවා තමන් ළඟ සුරැකිව තබාගත් බව එඩ්වඩ් පැවසුවේය.

“මම තාත්තට කිව්වා රතිඤ්ඤා ඔතන්න මේ සඟරා ටික නම් දෙන්න බෑ කියල. මම ඒවායින් තමයි දැනගත්තේ ආකෘති ගුවන් යානා කියල වර්ගයක් තියෙනවා. ඒවා බලාගෙන තමයි ලොකු ගුවන් යානා හදන්නේ කියලා. ඒ කාලේ ඔක්කොම මට හිනා වුණා.” එඩ්වඩ් සිය මතකය අවදි කළේය. 50 දශකයේ මීගමුව ආශ්‍රිතව කොහු මෝල් සහ මිරිස් මෝල් වැඩි වශයන් පිහිටා තිබුණු බව එඩ්වඩ් පවසයි. එම මෝල්වල පිහිටි විශාල යන්ත්‍ර සූත්‍ර දැක බලා ගැනීමට ඔහු වැඩිහිටියන්ගේ අතේ එල්ලී නිතර ගිය බව සිහිපත් කරන්නේ හදපිරි සතුටිනි. “මම ඒ කාලේ ඉඳන් හරි ආසයි මේ කැරකෙන පුදුම හිතෙන දේවල් බලන්න. 1952 මාරිස්ටෙලා ඉස්කෝලේ හිටපු සුදු බ්‍රදර් කෙනෙක් අපිට එන්ජිමක කුඩා ආකෘතියක් ගෙනත් පෙන්නුවා. ඒක වැඩකළේ වාෂ්ප බලයෙන්. හරියට අපේ ගමේ ලොකු මෝල්වල තිබුණ එන්ජිමක් වගේමයි. 65දී අපේ ඉස්කෝලේ තිබුණු ප්‍රදර්ශනයකට මම ඒ වගේම වාෂ්ප එන්ජිමක් හදලා පළවෙනියා වුණා…” යැයි එඩ්වඩ් පැවසුවේ අදටත් සිය පරීක්ෂණ කාමරය තුළ ඇති, තවමත් ක්‍රියාත්මක කළ හැකි එම ‘ජයග්‍රාහී එන්ජිම’ පෙන්වමිනි.

වාෂ්ප බලයෙන් ක්‍රියාකරන යන්ත්‍ර සූත්‍ර නිපදවන්නට කුඩා කළ ඇති වූ ආශාව අදටත් ඔහු තුළ පවතී. එබැවින් මේ දිනවලත් වාෂ්ප බලයෙන් ක්‍රියාත්මක වන තවත් නිර්මාණ කිහිපයක් එඩ්වඩ් අත්හදා බලමින් සිටී. ඒ අතර ඔහු අප කැඳවාගෙන ගියේ පරීක්ෂණ කාමරයෙන් පිටත ස්ථානයක තබා ඇති එඩ්වඩ් සිය මුණුපුරා වෙනුවෙන් සාදන ලද වාෂ්ප බලයෙන් ක්‍රියාත්මක වන දුම්රිය පෙන්වීමටය. ඉතා හොඳ නිමාවක් සහිත එම දුම්රිය එන්ජිම තුළ විශාල දුම්රිය එන්ජින් තුළ ඇති සියලු යාන්ත්‍රික කොටස් අන්තර්ගත බව එඩ්වඩ් විස්තර කළේය. පසුව ඔහු විසින් නිර්මාණය කළ රියැදුරකු නොමැතිව එකම දුම්රිය මාර්ගයක ප්‍රතිවිරැද්ධ දිශාවලට ධාවනය වන දුම්රිය දෙකක් පණ ගන්වා පෙන්වීය.“මේ වගේ ආදර්ශ හරි නම් තියෙන්න ඕන අපේ කාර්මික විද්‍යාලවල. මේ සිස්ටම් එක සම්පූර්ණයෙන්ම පරිගණකගත පරිපථ ආධාරයෙන් ක්‍රියාත්මක වෙන්නේ. කොයිම වෙලාවකවත් එක පීල්ලේ ආවට මේ කෝච්චි හැපෙන්නේ නෑ. ඒවා නියමිත තැන්වල නවත්තගෙන ඉඳලා තත්ත්පර කිහිපයක ගැප් එකකින් පීලි මාරු වෙනවා. ඒ අනුව නියම විදියට මේ සිග්නල් ලයිට් වැඩකරනවා…” යනුවෙන් එඩ්වඩ් පැවසුවේ කාර්මික අධ්‍යාපනය ලබන සිසුන්ට අවශ්‍ය මේ දැනුම බෙදාදෙන්නට ඕනෑම අවස්ථාවක සූදානම් බව සිහිපත් කරමිනි.

රෝද දෙකේ අත් ට්‍රැක්ටරය නිපදවීමෙන් කෘෂිකාර්මික ක්ෂේත්‍රයට කළ මෙහෙවර වෙනුවෙන් ලොවපුරා ප්‍රසිද්ධියට පත් ශ්‍රී ලාංකික ඉංජිනේරුවරයකු මෙන්ම නව නිපැයුම්කරුවකු සහ ගගන විද්‍යාඥයකු වූ රේ විජේවර්ධන හමුවීම එඩ්වඩ් පෙරේරාගේ ජීවිතයේ සන්ධිස්ථානයකි. “මම නිවාඩු තියෙන හැම වෙලාවකම ගිහින් ඩොක්ටර් රේ ට උදව් කළා. එයා ඒ වෙනකොට ගුවන් යානා දාහතරකට වැඩිය හදලා තියෙනවා. මිනිසුන්ට යන්න පුළුවන් ඒවා හදනකොට මමයි ලොකු පුතයි උදව් කළා. ඩොක්ටර් රේ අන්තිමට හදපු මිනිස්සුන්ට යන්න පුළුවන් යානය බලපත්‍රයකින් අපිට තෑගි කළා. ඒත් නඩත්තු කරන්න බැරි නිසා අපි ඒක භාරගත්තේ නෑ.” යනුවෙන් එඩ්වඩ් පවසද්දී ඔහුගේ වැඩිමහල් පුත්‍රයා ද ඒ අතීතය සිහිපත් කළේය. “රේ විජේවර්ධන හම්බ වෙනකොට මම හයවැනි පන්තියේ. එතනින් තමයි මට රේඩියෝ කොන්ට්‍රෝල් ප්ලේන්වලට, අල්ට්‍රා ලයිට් ප්ලේන්වලට යන්න පුළුවන් වුණේ. බොහොම සන්තෝෂයි කියන්න ලංකාවේ පළමුවෙන්ම හදපු අල්ට්‍රා ලයිට් සැහැල්ලු ගුවන් යානය හදන්න පුංචි කාලේ මට පුළුවන් විදියට දායක වෙන්න ලැබුණා. ඒක තමයි ඩොක්ටර් රේ විජේවර්ධන හදපු තණකොළ පෙත්තා කියන ගුවන් යානය…” යනුවෙන් කොලින් පෙරේරා බීබීසී සිංහල සේවයට පැවසුවේය.

එඩ්වඩ් පෙරේරාගේ අනෙක් පුත්‍රයා වන අමිත් පෙරේරා ද මේ දිනවල දුරස්ථ පාලකයකින් ක්‍රියාකරන විශාල ප්‍රමාණයේ යානාවක් නිර්මාණය කරමින් සිටී. ඔහු ඒ සඳහා යොදා ගන්නේ 150CC ධාරිතාවක් සහිත එන්ජිමකි. “මම හිතනවා මේක එකලස් කරලා ඉවර වුණහම මේක තමයි ලංකාවේ තියෙන දුරස්ථ පාලකයකින් ක්‍රියාත්මක වන ලොකුම යානාව වෙන්නේ. මේකේ තටු වල දිග අඩි 14ක් වෙනවා. කඳ අඩි 7ක්. මම දන්න තරමට දැනට ලංකාවේ දුරස්ථ පාලයකින් ක්‍රියා කරන ලොකුම 3-D එයාර් ක්‍රාෆ්ට් එක තියෙන්නෙත් මගේ ළඟ. සමහර බඩු අපි පිටරටින් ගේනවා. මේවයේ සැකිල්ල හදන්නේ, යකඩ ලේත් වැඩ සේරම කරන්නේ අපිමයි…” යනුවෙන් අමිත් පෙරේරා ප්‍රකාශ කළේය. අමිත්ගේ ගුවන් යානා නිර්මාණ සහිත කාමරයේ කොටසක් ඔහුගේ පුතු රෙහාන් පෙරේරා වෙනුවෙන්ද වෙන්කර තිබේ. අවුරුදු 9ක් වයසැති රෙහාන් ද පියා, සීයා සහ මහප්පා සමඟ එක්ව නව අත්හදා බැලීම් කරමින් සිටී.

එඩ්වඩ්ගේ දියණිය වන මිහිකා පෙරේරා මේ වන විට විදෙස්ගතව ජීවත් වන අතර ඇය සිය පවුලේ අත්දැකීම් මෙලෙස විස්තර කළාය.“පුංචි කාලේ ඉඳන් පවුලේ අපි පස්දෙනාම ගුවන් යානා පදින්න වගේම රිමෝට් කොන්ට්‍රෝල් යානා යවන්න කල්පිටිය වගේ පැතිවලට යනවා. බොහෝ දවස්වලට අපි යන්නේ ඉරිදා දවස්වලට. තාත්තත් එක්ක ප්ලේන්වල ගිය අත්දැකීම් හරිම සුන්දරයි.”ගුවන් යානා තාක්ෂණය කෙරෙහි දැනුමක් නොමැති වුවද සැමියාගේ සහ දරුවන්ගේ විනෝදාංශවලට තමන්ද ඉතා ප්‍රියකරන බව එඩ්වඩ්ගේ බිරිඳ විල්මා ප්‍රනාන්දු පැවසුවාය. “මම තමයි මේ සේරටම මුදල් කළමනාකරණය කරන්නේ. ඇතැම් ගමන්වලට මට යන්න ලැබෙන්නේ නෑ. ෆැක්ටරියේ වැඩ බලාගෙන ඉන්නවා. සතිය පුරාම අපි මහන්සි වෙලා හම්බ කරන දේ මේවට තමයි වියදම් කරන්නේ. අපේ පවුලේ වෙන වියදම් නෑ. අපේ පවුල්වල හැමෝම මේකෙන් ලොකු සතුටක් ලබනවා. මේක විනෝදාංශයක් වගේම අධ්‍යාපනයක් ලැබෙන වැඩක්…” විල්මා ප්‍රනාන්දු පැවසීය බී.බී.සී. සිංහල වෙබ් අඩවිය ඇසුරිණි

මාලිංග කියපු කතාව

තමා පමණක් නොවන මුළු මහත් ශ්‍රී ලාංකික ජනතාවම මහින්ද රාජපක්ෂ මහතාට කැමති බව සුපිරි ක්‍රිකට් ක්‍රීඩක ලසිත් මාලිංග සහන් කරනවා. ඒ ඔහු 30 වසරක් පැවති යුද්ධය අවසන් කළ නායකයා නිසා බවද ඔහු සදහන් කළා. ඊයේ (08) පැවති වියත් මග සමුළුවට හිටපු සුපිරි ක්‍රීඩක මුත්තයියා මුරලිදරන් සහභාගී වීම සම්බන්ධයෙන් හා ඔහුත් එම වේදිකාවට එක්වනවා දැයි මාධ්‍යවේදීන් ඇසූ ප්‍රශ්ණයකට පිළිතුරු දෙමින් ඔහු මේ බව සදහන් කර සිටියා. කෙසේ වෙතත් තමා ජනප්‍රිය ක්‍රිකට් ක්‍රීඩාවට පමණක් බවත්, එම නිසා ක්‍රිකට් ක්‍රීඩාවට හැකි උපරිම දේ සිදු කරනවා මිස පරිපාලනය කිරීමට තමාට හැකියාවක් නොමැති බවද මාලිංග සදහන් කළා.

මේ අතර ශ්‍රී ලංකා නිදහස් පක්‍ෂය ජනාධිපති ධුර අපේක්‍ෂකයෙකු ඉදිරිපත් කිරීමට තීරණය කර ඇත්තේ දිනන අපේක්‍ෂාවෙන්ද නැතහොත් වෙනත් අපේක්‍ෂකයෙකු පැරදවීමේ අභිලාෂයෙන්ද යන්න සැක මතු වන බව ශ්‍රී ලංකා පොදුජන පෙරමුණ පවසනවා. එහි සභාපති, මහාචාර්ය ජී එල් පීරිස් කොළඹ අද (09) පැවති මාධ්‍ය හමුවකට එක්වෙමින් මේ බව කියාසිටියා.

” ශ්‍රී ලංකා නිදහස් පක්ෂයේ තියෙන විකල්පයක් තමයි වෙනම අපේක්ෂකයෙක් කිරීමයි.එසේ සිදුකරනවා නම් ඇසිය යුත්තේ ඔවුන් මේ අපේක්ෂකයා නම් කරන්නේ ජයග්‍රහණය සඳහා ද නැත්නම් තවත් අපේක්ෂකයෙක් පරාජය කිරීම වෙනුවෙන්ද කියා සිතා බැලීම වැදගත් වන්නේ. මොකද ඔවුන් කියා සිටිනවා අපිට රජුන් තනන්න බැහැ කියා. එවැනි වාතාරණයක් යටතේ මෙලෙස අපේක්ෂකයෙක් ඉදිරිපත් කිරීම හරහා වන්නේ එක්සත් ජාතික පක්ෂයට විරුද්ධ අපේක්ෂකයා දුර්වල කිරීමේ වැඩපිළිවලක් ක්‍රියාත්මකයි කියලා තේරුම් ගන්න සිදුවෙනවා” මහාචාර්ය ජී එල් පීරිස් කියාසිටියා.

චීන දැරියගේ කතාව

චීනයේ හදිසි ඇමතුම් ඒකකයේ අංකය වන 110 භාවිත කරමින් චීන දැරියක් උදව් ඉල්ලීම සඳහා අපුරු සංඥා ක්‍රමයක් භාවිත කළ පුවතක් විදෙස් මාධ්‍ය වාර්තා කර තිබේ. මේ දැරියව යම්කිසි ආගන්තුක පුද්ගලයකු විසින් බලහත්කාරයෙන් ගුවන්තොටුපළක් වෙත රැගෙන යන අවස්ථාවේ දී ඔහුගෙන් මිදීම සඳහා මේ ක්‍රමය භාවිත කළ බව වාර්තා වේ. එම පුද්ගලයා විසින්ඇයට කිසිදු ශබ්දයක් කිරීම සඳහා අවස්ථාව නොදුන් නිසා “හරි” කීම සඳහා භාවිත කරන සියුම් අත් ඉඟියක් භාවිත කරමින් 110 ට ගන්නැයි ගුවන්තොටුපළේ සිටින පිරිසට මේ බව දන්වා ඇත.

ඇයගේ මේ සංඥා ක්‍රමය වටහා ගත් ගුවන්තොටුපළ නිලධාරීන් ඇයව ඔහුගෙන් බේරාගෙන ඇයගේ දෙමාපියන් වෙත ලබා දීම සඳහා කටයුතු කර තිබේ. නමුත් , ඇය සංඥා කරන වීඩියෝව චීන සමාජ මාධ්‍යවල විශාල ප්‍රතිචාරයක් ඇති කරමින් සංසරණය වීම නිසා චීන බලධාරීන් කලබලයට පත් වී ඇත. ඒ මෙම වීඩියෝ පටය රජය මගින් කළ නිවේදනයක් ලෙස සකස් වූවක් බවට බොහෝ සමාජ මාධ්‍ය භාවිත කරන්නන් චෝදනා කිරීම නිසාය. ඔවුන් උපකල්පනය කරන්නේ එය නිර්මාණය කර ඇත්තේ පොලිසියේ සහාය ලබා ගෙන බවයි.

එයට හේතුව ලෙස සමාජ මාධ්‍ය ක්‍රියාකරුවන් කියා සිටින්නේ ඇඟිලි දෙකක් එලෙස එකට තද කළහොත් චීන පොලිසියේ හදිසි ඇමතුම් අංකය වන ”110” ලෙස පෙනෙන බවයි. චීන බලධාරීන් ප්‍රකාශ කර සිටියේ ”කිසි විටෙකත් එවැනි අනතුරු ඇඟවීමේ ක්‍රමයක් ප්‍රසිද්ධියේ ප්‍රචාරය කර හෝ ප්‍රවර්ධනය කර නැත” යනුවෙනි.

ඇමරිකානු ජනපති ආර්යාව

මෙවර පැවැත්වෙන ජී හත සමුළුවේදී ඇමේසන් වනය නොහොත් ලෝකයේ පෙණහල්ල දවා හළු කරන මහා ගින්න ගැන වැඩි අවධානයක් යොමු කළ යුතු යැයි ප‍්‍රංශ ජනපති එමානුවෙල් මැක්රන් ප‍්‍රකාශ කර තිබුණේ මීට සති දෙකකට පමණ පෙරදීය. ‘‘මේ ගිනි ගන්නේ අපේ ගෙදර ” යනුවෙන් ඇමේසන් ගින්න ගැන හෙතෙම ට්විටර් පණිවුඩයක් නිකුත් කර තිබිණි. කෙසේ නමුත් ඇමේසන් ගින්න වේගයෙන් පැතිරෙද්දී ප‍්‍රංශයේ බියාරිට්ස් නගරයේදී පැවැති ජී හත සමුළුවට සහභාගිවූ රාජ්‍ය නායකයින් සිය බිරින්දෑවරුන් සමග සිටිමින් ගත් ඡුයාරූපය අතරින් කිහිපයකට ලෝක මාධ්‍යවල බලවත් අවධානය යොමුව තිබිණි. සමාජ මාධ්‍ය කැළඹූ මේ අනුරාගී සේයාරූ කිහිපයේ සිටින්නේ කවරෙකුද? කැනඩා අගමැති ජස්ටින් ටෘඩෝ හා ඇමෙරිකානු ජනපති බිරිය මෙලනියා ට‍්‍රම්ප්ය. ජි හත සමුළුවට සහභාගිවූ ලෝක නායකයින් සිය බිරින්දෑවරුන් සමග සමුහ ඡුයාරූපයකට පෙනී සිටීමෙන් අනතුරුව එක් එක් රාජ්‍ය නායකයින්ගේ බිරින්දෑවරු සෙසු නායකයින්ට හාද්දක් ලබා දී සුබ පැතීම සාමාන්‍ය සිරිතකි. මේ අතරතුර ඇමෙරිකන් ජනපති බිරිඳ මෙලනියා ට‍්‍රම්ප් කැනඩා අගමැති ජස්ටින් ටෘඩෝ දෙස අනුරාගී දෑසින් බලා හාද්දක් ලබා දෙන සේයාරුව ලොව පුරා ඉමහත් ජනප‍්‍රියවී ඇත.

මේ සමුළුවේ දී ලෝකය උණුසුම්වීම ගැන, ඇමේසන් වනයේ විනාශය කතා වූවාදැයි උනන්දු නොවන පිරිස මේ අනුරාගී සේයාරුවට නම් වශීවී සිටිති. ඒ ගැන දොසක් දැකිය නොහැක. පැපරාසියෝ ලොවම් කළඹා තිබේ. මෙලනියාගේ හාද්දට වශී වූවත් ප‍්‍රංශ ජනපති බිරිඳ බි‍්‍රජට් මැක්රෝන් ලෝක බලවතාට එනම් ට‍්‍රම්ප්ට දෙන හාද්ද ගැන නම් බොහෝ දෙනකු තුළ උනන්දුවක් නැත. එහි ඇති අනුරාගයක් නැත. එය ගුරුතුමිය විසින් තම සිසුවාට දෙන හාද්දකි. අයිරිෂ් ටයිම්ස් පුවත්පත පවසන්නේ පස් හැවිරිදි දැරියක් සිය මව විසින් හඳුන්වාදුන් අලූත්ම මාමාට රාත‍්‍රියට සුබ පැතීම පිණිස ලබාදෙන හාද්ද හා මේ සිප ගැනීම සමාන වන බවයි. පස් හැවිරිදි දැරියගේ සිප ගැනීම තුළින් ප‍්‍රකට වන්නේ කවර අනුරාගයක් ද? 73 හැවිරිදි ට‍්‍රම්ප් සිපගන්නේ 66 හැවිරිදි ප‍්‍රංශ ජනපති බිරිඳ විසිනි. මොවුන් අතර වැඩි වයස් පරතරයක් නම් නැත. නමුත් ප‍්‍රංශ ජනපති බිරිඳ සිය සැමියාට වඩා වසර 15ක් වැඩිමහලූය. ඇත්තෙන්ම මක්රෝන් විවාහ වූයේ තම ගුරුතුමිය සමගය. එය වෙනම කතාවකි.

කැනඩා අගමැති 47 හැවිරිදි වියේ පසුවන තිදරු පියෙකි. ජනපති ආර්යාව 49 වැනි වියේ පසුවෙයි. ට‍්‍රම්ප් හා මෙලනියා අතරද වයස් පරතරය අවුරුදු 14 කි. එය ප‍්‍රංශ යුවළගේ පරතරයට වැඩ වෙනස් වන්නේ අවුරුද්දකිනි. සිය වැඩිමහලූ සැමියාගේ අතේ එල්ලීගෙනම ඇය කැනඩා අගමැතිගේ කම්මුලට හාද්දක් පිරිනමයි. මේ සේයාරුව සමාජ මාධ්‍ය ජාලා කළඹා ඇති අතර ඒවායේ සඳහන් වන සටහන් හාස්‍ය උපදවයි. එක අයකු සටහන් කර ඇත්තේ මෙලනියා කැනඩාවට පැන යෑමට සිතන බවයි. තවත් අයකු මීළඟ දේශ සීමා තාප්පය ඉදිවන්නේ කැනඩාව හා ඇමෙරිකාව අතර බව කියයි. සැවොම මෙලනියාගේ අනුරාගී බැල්මට වසඟ වී ඇති සෙයකි. මෙලනියාගේ බැල්ම ගැන ට්විටර් සටහනක් තබන එක් කාන්තාවක් ලියා තිබුණේ මෙවන් බැල්මක් තමා අන් පිරිමියකුට හෙළනු දුටුවේ නම් තම සැමියා අනිවාර්යයෙන්ම ඇයව දික්කසාද කරනු ඇති බවයි. ඒනිසා මේ බැල්ම කාන්තාවන්ද කම්පනය කර ඇති සෙයකි. කිසිවකු ආරක්ෂිත නැත නුඹේ ගැහැනු ළමයා අගමැති විසින් සොරා ගෙන ඇත යනුවෙන් තවත් ට්විටර් සටහනක දැක්විණි.

අයිරිෂ් ටයිම්ස් පුවත්පතේ සඳහන් වන්නේ මෙලනියා ගේ රතු ගවුම් සමග මේ අනුරාගය ඉතා හොදින් පැහෙන බවයි. එහෙත් ඒ වගක් ජනපති ට‍්‍රම්ප්ට නැත. ඔහු වෙන කල්පනාවකය. මේ අනුරාගය සොරා ගන්නේ පැපරාසීන් විසිනි. එයින් කැනඩාව හා ඇමෙරිකාව අතර උණුසුමක් ඇතිවේද? ඇත්තෙන්ම ඇමෙරිකානු ජනපති ආර්යාවගේ ඇඳුමේ වටිනාකම ඩොලර් හාරදහසකි. මෙලනියාගේ ප‍්‍රභාවට වෙන කිසිම ජනපති ආර්යාවකට ළංවිය නොහැක. ඇත්තෙන්ම ඇය ප‍්‍රංශයේ සිට පෙරළා ඇමෙරිකාවට එද්දී පැළඳ සිටි සපත්තු යුගළය පවුම් 445ක් වටිනා අතර ඇෙඟ් ඇත බෑගයේ වටිනාකම පවුම් දහනම දහස ඉක්මවයි. ප‍්‍රකෝටිපති ජනපති බිරිඳ එසේ නමුත් ඇෙඟ් නුරා බැල්මේ වටිනාකම කෙසේ ගණනය කරම්ද? මෙලනියා, ට‍්‍රම්ප් සමග විවාහ වූයේ 2005 වසරේදීය. ඇය ඇමෙරිකානු පුරවැසි භාවය ලබාගත්තේ 2006 වසරේදීය. වෙනත් රටක ඉපිද ඇමෙරිකානු ජනපති ආර්යාව බවට පත්වූ දෙවැනි කත ඇයයි. මේ විවාහයෙන් ඇය එක දරුවකු බිහිකළාය. ඒ බැරන් ට‍්‍රම්ප් වේ. මීට පෙර අන් කිසිම ජනපති ආර්යාවක් කතා නොකළ ආකාරයට භාෂා හයක් චතුරව ඇයට කතා කළ හැකිය. ඉංග‍්‍රීසි,ප‍්‍රංශ,ජර්මන්, ඉතාලි, සර්බියන් හා ස්ලෝවැකියන් බස ඇයට හැසිරිවිය හැක. ජැකලින් කෙනඩිට පසුව කතෝලික ආගම අදහන ජනපති ආර්යාව මෙලනියා වේ. එසේම මවුබස ඉංග‍්‍රීසි නොවන මුල්ම ඇමෙරිකානු ජනපති ආර්යාවද ඇයමය

සල්මන් නිවසක් තැගි දුන් කතාව

‘කල්කටාවේ ලතා මංගේෂ්කර්‘ ලෙස එක් රැයකින් කිරුළු පළන් රණු මොන්ඩාල්ව ජනප්‍රිය නළු සලමාන් ඛාන් ඔහුගේ Dabangg 3 චිත්‍රපටයේ පසුබිම් ගායනයට එක් කර ගැනීමට තීරණය කර තිබේ. මේ වනවිට සමාජජාලා මාධ්‍යයන් හි අතිශය ජනප්‍රිය වී ඇති ඉන්දීය ගායිකා රානු මොන්ඩාල්ට සුපිරි නළු සල්මාන් ඛාන් විසින් ඉන්දීයරුපියල් ලක්ෂ 55ක් වටිනා තට්ටු නිවසක් තැගි දුන් පුවතක් මේ වනවිට සමාජ මාධ්‍යයන් හි සැරිසරයි. කෙසේ වෙතත්, රානු මොන්ඩාල්ට රාණගාට්හි දුම්රිය නැවතුම් පොළේ සේවයේ නිරතව සිටින රානුට හිතවත් සමාජ සේවිකාවක් පවසන්නේ සුපිරි නළුවා එවැනි ත්‍යාගයක් රානුට ලබා නොදුන් බවය. කෙසේ වෙතත්, ඉන්දීය ගායක, ගායිකාවන් කිහිප දෙනෙකු මේ වන විට රානුට උදව් කරමින් සිටින බවද ඇය වැඩි දුරටත් පවසා තිබුණි.

දුම්රිය පොළක දී ඇය ගායනා කළ ගීතයක් ජංගම දුරකතනයකින් වීඩියෝ කර සමාජ මාධ්‍ය වෙත මුදා හැරීමත් සමඟ රනු මන්දල් ලොව පුරා වේගයෙන් ජනප්‍රියා චරිතයක් බවට පත් වූවාය. හිමේෂ් රෙෂමමියා වෙනුවෙන් මුළින් ම පටිගත කළ ඇගේ තෙරී මෙරී කහානි ගීතිය හැපී, හාර්ඩි ඇන්ඩ් හීර් චිත්‍රපටය සඳහා යොදා ගැනීමට නියමිතය. රනු මොන්ඩාල් උපත ලැබුවේ බටහිර බෙංගාලයේ ක්‍රිෂ්ණනගර්හි වන අතර ඇය සිය ළමා කාලය වැඩි කාලයක් ගත කර ඇත්තේ රණගට්හි ඇගේ නැන්දණියගේ නිවසේය. වයස අවුරුදු 19 දී ඇය විවාහ වී ඇති අතර යුවළ ඉන්පසු මුම්බායි වෙත පැමිණ තිබේ. කෙසේ වෙතත්, ඇගේ සැමියාගේ අභාවයෙන් පසු ඇය නැවත රණගාට් වෙත පැමිණ ඇත. 50 හැවිරිදි වියේ පසුවන රණූ, රණගාට් දුම්රියපොළේ ගායනා කිරීම වෙනුවෙන් මගීන් ලබා දෙන මුදලින් ආහාරපාන මිල දී ගෙන තිබේ. ඇයගේ ගායනය දුටු 26 හැවිරිදි ඉංජිනේරුවකු වන අතින්ද්‍රා චක්‍රවර්ති එය වීඩියෝ කර අන්තර්ජාලයට එක් කර තිබුණි.

ඒත් එක්කම බොහෝ දෙනෙක්ගෙ අවධානය යොමු වෙච්ච කාරණයක් වුණේ අවුරුදු 10කින් රණූ මොන්ඩාල් ගැන සොයා නොබැලූ ඇගේ දියණිය නැවත රණූව හමුවී සබඳකම් අලුත් කරගත්ත එක ගැනයි. බොහෝ දෙනෙක් මේ පිළිබඳව තමන්ගේ අප්‍රසාදය පළ කරමින් එම දියණියට දොස් කියනු දකින්න ලැබුණා තම මවට ලැබුණු ජනප්‍රියත්වය සහ මුදල් දැකලා පැමිණිලාය කියලා. මේ ගැන තමන්ගේ පැත්තෙන් කරුණු දක්වන්න රණූ මොන්ඩාල්ගේ දියණිය වන එලිසබත් සාති මේ වෙද්දි කටයුතු කරලා තියනවා.

ඇය කියන්නේ තමන්ගේ මව දුම්රිය පොළක ගී ගයමින් සිටින බවක් ඇය දැන හිටියේ නැති බවයි. විවාහයෙන් පසු තම මව සමග ඇති ආශ්‍රය සීමා වුණත්, තමන්ට හැකි හැම අවස්ථාවකදීම තමන් මවට මුදලින් සහ ආහාර ද්‍රව්‍යවලින් උදවු උපකාර කළ බව ඇය පවසනවා. තමන් සමග ජීවත් වෙන්නට එන්නටයැයි රණූ මොන්ඩාල්ට කීප විටක්ම ඇවටිලි කළත් ඒ හැම අවස්ථාවකදීම ඇය එම ඉල්ලීම ප්‍රතික්ෂේප කළ බවට දුව පවසනවා. රණූ මොන්ඩාල් දෙවතාවක් විවාහ වී ඇති අතර තමන් ඇගේ පළමු විවාහයේ බාල දියණිය බවට ඇය පවසනවා. තම මවට දරුවන් හතර දෙනෙක්ම සිටියත් සමාජයෙන් දොස් අසන්නට සිදුව ඇත්තේ තමන්ට පමණක් වීම කණගාටුදායක බවත් ඇය වැඩිදුරටත් කියා සිටිනවා.

ජපානයේ රැකියා අවස්ථා

ශ්‍රී ලංකා රජය සමඟ ජපාන රජය ඇතිකරගෙන තිබෙන අවබෝධතා ගිවිසුම් අනුව ශ්‍රී ලාංකිකයින්ට ජපානය තුළ රැකියා අවස්ථා ලබාදීමේ වැඩසටහනක් ශ්‍රී ලංකා විදේශ සේවා නියුක්ති කාර්යාංශය මගින් ආරම්භ කර තිබේ. ප්‍රධාන ක්‍රම 2ක් මගින් මෙම රැකියා අවස්ථාවන් ශ්‍රි ලාංකිකයින්ට ලබාගත හැකි බව කාර්යංශය සදහන් කරනු ලැබේ. 1. තාක්ෂණික සේවාස්ථ පුහුණුව සමඟ රැකියා කිරීම සඳහා වන ගිවිසුම – NEW TITP 2. විශේෂිත කුසලතා සහිත අය සඳහා රැකියා ලබාදීමේ ගිවිසුම – SSWRP

NEW TITP – තාක්ෂණික සේවාස්ථ පුහුණුව සමග රැකියා කිරීම සදහා වන ගිවිසුම යටතේ, ශ්‍රි ලංකා විදේශ සේවා නියුක්ති කාර්යාංශය මගින් හෝ කාර්යාංශ අනුමැතිය සහිත පෞද්ගලික රැකියා නියෝජිත ආයතන මගින් මේ සඳහා ඉදිරිපත් විය හැකිය. කාර්යාංශය මගින් IM ජපන් ආයතනයට සිදුකරන බදවා ගැනීම් නොමිලේ සිදුකරන අතර, තෝරා ගන්නා තරුණ තරුණියන්ට සිය පෞද්ගලික වියදම් සදහා යම් පිරිවැයක් දැරිය යුතුවේ. මෙම රැකියා සදහා අයදුම්කරන ශ්‍රමිකයින්ට ජපන් භාෂා ප්‍රවීණතාවය පිළිබද පිළිගත් සුදුසුකමක් තිබිය යුතු වේ. (N5/N4)

කාර්යාංශයේ අනුමත පෞද්ගලික රැකියා නියෝජිත ආයතන සිදුකරන බදවා ගැනීම් සදහා සුදුසුකම් ලත් තෝරාගත් අයදුම්කරුවන්ගෙන් ගාස්තු අය කළ හැකි අතර, එසේ අය කිරීම සදහා අනුමත කළ ගාස්තුව රුපියල් 350,000.00 ට වඩා අඩු විය යුතුය. එසේ අනුමත කර ඇති ගාස්තුව කාර්යාංශ වෙබ් අඩවිය මගින් නිරීක්ෂණය කිරීමටද හැකිය. තවද, ජපාන බදවාගැනීම් සදහා මේ වන විට බලපත්‍ර ලාභී රැකියා නියෝජිත ආයතන 51ක් සදහා ජපානයේ OTIT අනුමැතිය ලබාදී ඇත. එම අනුමැතිය ලත් රැකියා නියෝජිතායතන ලැයිස්තුව slbfe වෙබ් අඩවිය මගින් නිරික්ෂණය කළ හැකිය.

SSWRP – විශේෂ කුසලතා සහිත අය සදහා වන ගිවිසුම අනුව ජපානය විසින් හදුන්වා දී ඇති විශේෂ කුසලතා සහිත ශ්‍රමිකයින්ට ජපානයේ රැකියා සදහා යාමට අවසථාව සලසා දෙයි. මෙම ගිවිසුම අනුව ක්ෂේත්‍ර 14ක් යටතේ රැකියා අවස්ථාවන් ලබාගත හැකිය. සාත්තු සේවිකා, ගොඩනැගිලි පිරිසිදු කරන්නන් (SSWRP), යන්ත්‍ර කොටස් හා එකලස්, කාර්මික යන්ත්‍ර කර්මාන්තය, විද්‍යුත් හා ඉලෙක්ට්‍රොනික් හා තොරතුරු කර්මාන්තය, ඉදිකිරීම් ක්ෂේත්‍රය, නැව් කර්මාන්තය, රථවාහන හා නඩත්තු, ගුවන්යානා කර්මාන්තය, නවාතැන් පහසුකම්, කෘෂිකර්මාන්ත, ධිවර හා ජලජීවි වගාව, ආහාර පාන නිශ්පාදනය, ආහාර සේවා සැපයුම් එම ක්ෂේත්‍ර 14 වේ. මෙම SSWRP වැඩසටහන සදහා කිසිඳු දේශීය රැකියා නියෝජිත ආයතනයකට බඳවාගැනීම් සඳහා විදේශ සේවා නියුක්ති කාර්යාංශය මඟින් අවසර ලබාදී නොමැත.

මෙම වැඩසටහන මගින් ජපානයේ රැකියා සදහා යාමට සුදුසුකම් තිබෙන අපේක්ෂකයින් සදහා කාර්යාංශ වෙබ් අඩවියේ පළකර ඇති අයදුම්පත්‍රය පුරවා කාර්යාංශය වෙත එවිය යුතුය. එසේ එවීමෙන් පසුව එම සුදුසුකම් සහිත අයදුම්කරුවන් සදහා ජපානය විසින් ශ්‍රි ලංකාවේදී පවත්වන විශේෂ කුසලතා පරික්ෂණ පැවැත්වීමට කාර්යාංශය ඉදිරියේදී කටයුතු සිදුකරනු ඇත. මේ පිළිබදව විවිධ වැරදි මත පළකරමින් පුද්ගලයින් නොමග යවන ව්‍යාජ පුද්ගලයින් හා ආයතන ජපාන රැකියා සදහා ඔවුන්ටද ශ්‍රමිකයින් යැවීමට හැකි බව හා රජයට සම්බන්ධ බව පවසමින් මුදල් අයකරන සිදුවීම් කාර්යාංශයට වාර්තා වෙයි. එබැවින් ජපන් රැකියා සදහා මුදල් අයකරන පුද්ගලයින්ට හසු නොවන ලෙසත් එවැනි පුද්ගලයින් පිළිබදව තො‍රතුරු දන්නේ නම් කාර්යාංශයට ඒ පිළිබදව දැනුම් දෙන ලෙසත් කාර්යාංශය මහජනතාවගෙන් ඉල්ලා සිටියි. ජපන් රැකියා පිළිබද සියළු විස්තර slbfe යන කාර්යාංශ වෙබ් අඩවිය භාවිතා කිරීමෙන් දැනගත හැකිය.

ගලේ බර කිලෝ 45 යි

ධන නිධානයක් දෙපතුල මතට පතිත වුවද, වාසනාව නැති නම් එයින් ඵලක් නැත. කෝටි ගණන් ස්වීප් ටිකට් දිනුම් ලැබී අසීමිතව වියදම් කර අවසානයේ පිච්චිය නැතිව කුලීකරුවන් ගානට වැටුණු මිනිස්සු අප අතර සිටිති. විවිධාකාරයෙන් වස්තුව උරුම වී සුර සැප විඳ හිඟමනට වැටුණු අවාසනාවන්තයන් මේ සමාජයේ විරල නැත. දැන් අප කියන්න යන්නේ එසේ මෙසේ වස්තුවක් උරුම වූ කෙනෙක් ගැන නොවේ. ලෝකයේ වැඩිම වටිනාකමක් සහිත මැණික් සම්පත හිමි වූ පවුල ගැන කතාවක්ය.

එහෙත් එම මැණික් නිධානයේ හිමිකරුවන් අද කුලීකරුවන්ය. මැණික් ගල් පොකුර ප‍්‍රථමයෙන් දුටු ආරියදාස අදටත් අනුන්ගේ පතල්වල දුක් විඳින්නේය. මැණික් නිධානය ගැන හීනෙන් දුටු ආරියදාසගේ වැඩිමහල් සහෝදරයා තිලකදාස කොළඹ වඩු මඩුවක වැඩය. මැණික ගෙන ගොස් රත්නපුරේ ප‍්‍රබල දේශපාලනඥයකුට පෙන්වා ඔහු මාර්ගයෙන් ලෝක පූජිත මැණික් ව්‍යාපාරිකයකුට ගල විකුණු ආරියදාසගේ මස්සිනා (අක්කාගේ සැමියා) මේ වන විට කැලණියේ ලී මෝලක රැකියාව කරන්නේය. ඒ බව අපට කීවේ ලෝකයේ වටිනාම මැණික් ගල ප‍්‍රථමයෙන් අත ගෑ ආරියදාසමය.

පසුගිය දිනක වැසි බර හැන්දෑවක පතලේ වැඩ නිමා කොට නිවස බලා යමින් සිටි ආරියදාස අපට මුණගැසුණේ අහම්බෙනි. පැල්මඩුල්ල ප‍්‍රදේශයේ අතුරු මාර්ගයකදී හමු වූ ආරියදාසට ගමන් බිමන් යෑමට යතුරු පැදියක් හෝ නැත. මල කෑ පරණ පහේ පා පැදියකින් ගමන් කරමින් සිටි ආරියදාස කහට කෝප්පයක් බීමට තේ කඩයක් අසල නතර කළ අවස්ථාවේ ඔහු අපට හඳුන්වා දුන්නේ කඬේ මුදලාලිය. ආරියදාස හතර රියන් පෙනුමැති පුද්ගලයෙකි. ඔහුගේ තාරුණ්‍යය වියපත් වී ඇත්තේ පතලටමය. වයස අවුරුදු හතළිස් හය සම්පූර්ණ වී ඇති ආරිගේ පළල් පපුව ඉදිරියට නෙරාවිත්, අත් ගොබ අසාමාන්‍ය ලෙස පිම්බි ඇත්තේ කායවර්ධන ව්‍යායමවල යෙදෙන තරුණයකු ලෙසටය. එහෙත් ඔහුට ‘ජිම්’වල යකඩ ඉස්සීමට වියදම් කිරීමට මිල මුදල් නැත. ඔහුගේ ශරීරය පෘෂ්ටිමත් වී ඇත්තේ ගැටයා සන්දියේ සිට පතල්වල වැඩ කිරීමෙනි. තළෙලූ මුවමඬල හිනාවකින් හැඩ කරගෙන ඔහු අප ඉදිරියේ අසුනකට බර තැබීය.

‘‘අපට අහිමි දේවල් ගැන මතක් කරන්නවත් මම නම් කැමැති නෑ. ඒත් ඒ කතාව මහත්තෙලාට වටිනවා නම් මම කියන්නම්…’’ හැඟීම්බර වූ ආරියදාස කහට උගුරක් බී සක්කර කෑල්ලක් හපමින් එසේ කීවේය. ‘‘ඒක ඉල්ලමක ගල් නෙමෙයි. අපිට හිතෙන විදිහට නිධානයක්. කවුද කෙනෙක් අපේ ලොකු අයියට හීනෙන් කියලත් තිබුණා ‘නිධානයක උරුමකම් තියෙනවා. කාටවත් කියන්න එපා ඒ නිධානයේ උරුමක්කරුව උඹයි’ කියලා. නිධානය තියෙන තැනත් අයියට කියලා තිබුණා. එතකොටත් අයියා පතල් රස්සාව කරනවා. අයියා ඒ කතාවට බය වෙලා. අයියා නිධානය ගන්න උත්සාහ කළේ නෑ…’’ දවස පුරා තෙත් කළ චුරු, චුරු වැස්ස පැල්මඩුල්ල දොරේ ගලන තරමට තද කෙරිණි. වැස්ස කඩාහැළෙන මහ ශබ්බදයට කතා කරන අපේ හඬ නොඇසෙන ගානය.

‘‘ඔය මැණික් ගල් ටික අපිට ලැබුණේ 1986 අවුරුද්දෙ දවසක. එතකොට අපිට තිබුණේ පුංචි මැටි ගෙයක්. දහයකට, දොළහකට ඒ ගේ කෑල්ල ඉඩ මදි. අපේ පවුලේ සේරම සහෝදර, සහෝදරියො දහදෙනයි. මම තමයි පවුලේ බාලයා. එතකොට මට වයස අවුරුදු නවයයි. ලොකු අයියට අවුරුදු තිහක් විතර ඇති. අක්කලා විතරයි කසාද බැඳලා ගෙදරින් ගිහින් හිටියේ. ගේ කෑල්ල ඉඩ මදි නිසා තමයි තව කාමර කෑලි දෙකක් බැඳගන්න ලකලෑස්ති වුණේ. දවසක් ලොකු අයියයි, පොඩි අයියයි, මමයි කැට ගල්වලින් කාමර කෑලි දෙක බඳින්න මැටි කපන්න ගත්තා. මුලින්ම මැටි කැපුවේ වත්ත පහළින්. මැටි වළ ටිකක් යටට බහිනකොට එහෙම්පිටින්ම මිනිස් ඇටසැකිල්ලක් මතු වුණා. ඒක දැක්කට පස්සෙ ඒ වළ වහලා අපේ ගෙට උඩින් මහ පාරට එහා පැත්තෙ කණ්ඩිය කපලා පස් ගත්තා. පාරට බෑවුම් වෙච්ච ලොකු කණ්ඩියක් නිසා මිනිස්සු පස් කපාගෙන ගිහින් තිබුණා…’’

‘‘අපි පස් කපන්න පටන් අරගෙන වරුවක් විතර යනකොට මම කණ්ඩිය උඩට නැගලා නික පඳුරකුත් කපලා පස් කණ්ඩියට ගල් ඉන්න ගැහුවා. ටාන් ගාල ශබ්දයත් එක්ක ගල් ඉන්න දෙදරුවා. අයියලාටත් කියලා ගල් ඉන්න වැදුණු තැන පස් ඉවත් කරලා ගල මතු කරගත්තා. මිරිස් ගලක් වගේ ගල් පොත්තක්. ඒ ලොකු ගල වටේට තව ලොකු, පොඩි ගල් ගොඩක් තිබුණා. ගල් පොකුරම එකම වගෙයි. බැලූ බැල්මට තිරිවාන ගල්ම තමයි. බිත්තිවලට තියලා මැටි ගහන්න පුළුවන් කියලා සේරම ගල් කෑලි ටික පහළට අරගෙන යමු කියලා ලොකු අයියා කිව්වා. තරමක ගල් කෑලි ටික පෝර උරයකට දාගෙන මම පහළට උස්සගෙන ආවා. ලොකු ගල අපේ ලොකු අයියටවත් තනියෙන් උස්සන්න බැරි වුණා. තුන්දෙනත් එක්කම උස්සල තමයි ලොකු අයියගේ කරට තියාගත්තෙ. මිරිස් ගලක් වගේ ගල් පොත්තක් නිසා අපිට පොඩි අමුත්තක් දැනුණා. කෝකටත් කියලා අපි හොදට ගල හේදුවා. තට්ටු කරලා ගල වටේ කොරසම ඇරලා බැලූවා. කොරසම ඇතුළෙන් තැනින්, තැනින් නිල් පාට පේන්න ගත්තා. තිරිවාන ගලක් නෙමෙයි, වටිනාකමක් ඇති ගලක් විත්තිය අයියට තේරුණා. ඒත් ගල ලොකු නිසා අයියා බය වුණා. පතලක වැඩ කරන කෙනෙක් ලොකු ගලක් විකුණුවා කියලා කට කතාවත් ගියොත් ඒක ලොකු ගැටලූවක්. අයියට තිබුණේ ඒ බය තමයි…’’

‘‘ඒත් අපි ඒ ගල් බිත්තියට තියලා මැටි ගැහුවේ නෑ. එතැනින් ගෙනාපු සේරම ගල් කෑලි ටික ගේ ඇතුළේ ඇඳක් යටට දැම්මා. සතියක් විතර ගල් කෑලි ටික ඇඳ යට තිබුණා. දවසක් අපේ ගෙවල් කිට්ටුව ගෙදරකට බඩු වගයක් ගේන්න කොළඹ යන්න මටත් කතා කළා. වාහනයක යන නිසා මමත් ආශාවට ගියා. ඒ යනකොටත් මම තාත්තට කියලා ගියා පිට කිසිම කෙනෙකුට ගල් කෑලි ටික පෙන්වන්න එපා කියලා. මම පොඩි වුණාට ඒ ගල් කෑලි ටික දැක්ක මොහොතේ ඉඳලා අමුත්තක් දැනුණා. ඒත් මම කියන දේ තාත්තා ඇහුවේ නෑ. අපේ ලොකු මස්සිනාට ගල් කෑලි ටික පෙන්නලා තිබුණා. ඒ පෙන්නපු දවසේ රාත්තිරියේම මස්සිනා වෑන් එකක් කතා කරගෙන ගලත් අරගෙන තාත්තාවත් දාගෙන දේශපාලනඥයකුගේ ගෙදරකට ගිහින් තිබුණා…’’ කහට උගුරක් තොල ගෑමට ආරියදාස කතාව නතර කළේය.

ආරියදාසගේ මස්සිනා ආරියසිංහය. ආරියදාස කියන විදිහට ආරියසිංහ මාමණ්ඩි සමඟ ගල දේශපාලනඥයාගේ නිවසට ගෙන ගොස් ඇත්තේ ගමේ ග‍්‍රාම සේවක මහත්තයාගේ වෑන් රථයේය. ඔහු ධර්මදාසය. ආරියදාස කියන කතාවේ සත්‍යතාව තක්කෙටම තහවුරු කරගැනීමට අපි ධර්මදාසව ද කතාවට සම්බන්ධ කරගත්තෙමු. ‘‘ආරි මගෙ හොඳ හිතවතා. ඕනෑම දෙයක් මට කියනවා. ඔය කියන දවස්වල ආරි මාව මුණගැහිලා ‘හවසට පොඩි හයර් එකක් යන්න තියෙනවා ගමන් බිමන් දාගන්න එපා’ කියලා කිව්වා. ඒ කිව්වා වගේම හවස පහට විතර මගෙ වාහනයෙන් ආරියි තව දෙන්නෙකුයි බටලන්දේ එයාගේ නෝනගෙ මහගෙදරට ඇවිත් මිරිස් ගලක් කියලා ගෝනියක දාපු ගලක් ගෙනත් වෑන් එකට දැම්මා. ආරිත් එක්ක ගිය කෙනෙක් හරිම අමාරුවෙන් ගල උස්සගෙන ආවේ. ඊට පස්සෙ කෙළින්ම ආවේ ආරිලාගේ ගෙදරට. ගල බාලා මම යන්න හදනකොට ආරි කිව්වා චුට්ටක් ඉන්න පොඩි බඩුවක් තියෙනව බලමු කියලා. ඊට පස්සෙ ගල එළියට අරගෙන කෑලි පහේ ටෝච් එකක් ගහලා බැලූවා. කිසිම දෙයක් පෙන්නෙ නෑ. මුළු ගලම කොරසමෙන් වැහිලා. මේ තඩි තිරිවානයක් කියලා මම වාහනයත් ස්ටාර්ට් කරගෙන ආවා. ඊට පහුවෙනිදා මට ආරංචි වුණා ඒ ගල මැණිකක්. දේශපාලනඥයකු මාර්ගයෙන් රත්නපුරේ ඉහළම මැණික් මුදලාලි කෙනෙකුට විකුණලා කියලා…’’

‘‘ගල කිරලා තිබුණේ තේ දලූ කිරන තාරදියේ. කිලෝ හතළිස් ගාණක් තිබිලා තිබුණා. ඒ ගලත් එක්ක තිබුණු කිලෝ හයක ගලක් පස්සෙ දවසක ආරිම ගෙනත් අර මුදලාලිටම විකුණුවා. අපේ ගෙදරදී ග‍්‍රෑම් දෙසිය පනහක තව ගලක් විකිණුවා. හැබැයි ඒ සියලූ ගල්වල කොරසම තිබුණා. කොරසම ඇරලා ගත්තට පස්සෙ නිල් පාටට දිලිසෙනවා. කොරසම පතුරු හරිනකොට ඒ පතුරුත් එක්ක ගැලවිලා ආපු මැණික් කෑලි ගෙනිහින් සුද්දෙකුට විකුණලා මම රුපියල් දහදාහක් ගත්තා. ඒ කාලෙ රුපියල් දහදාහක් කියන්නෙ ලොකු මුදලක්…’’ විශ‍්‍රාමික ග‍්‍රාම නිලධාරී ධර්මදාස මහතාගේ අදහස් දැක්වීම අවසාන වූ පසු ආරියදාස ද කැටුව ලොව වටිනාම මැණික් ගල් සහිත නිල් මැණික් පොකුර ලැබුණු ස්ථානයට ගියෙමු. රත්නපුර පැල්මඩුල්ල ප‍්‍රධාන මාර්ගයේ බටලන්ද ප‍්‍රදේශයේ ස්ථානයකි. ආරියදාසලාගේ මහගෙදර පිහිටා ඇත්තේ ඒ මැණික් පොකුර ලැබුණු ඉඩම ඉදිරිපිටය. දැන් ඒ නිවසේ ජීවත් වන්නේ ආරියදාසය. ඒ නිවසට යාබද ප‍්‍රධාන පාර අද්දර තියෙන තේ කඩය ආරියදාසගේ අක්කාගේය.

‘‘අන්න අතන තිබිලා තමයි මැණික් ගල් ටික ලැබුණේ…’’ ආරියදාස තේ කඩය ඉදිරිපිට සිට ප‍්‍රධාන පාරට මූණත වැටුණු තරමක් උස පස් කණ්ඩියක් පෙන්නුවේය. කැලෑ ගාලකින් වැසුණු බෑවුමේ කිසිම දෙයක් නොපෙන්. පැල්මඩුල්ල බෝඞ් එකක් නම් ලොකුවට පෙනිණි. ‘‘මේ ඉඩමට කියන්නෙ යෝගගේ වත්ත කියලා…’’ ආරියදාස නැවත කතා කරන්නට පටන් ගත්තේය. ‘‘මේ මුළු ඉඩම අක්කර දහයක්. පාරට අක්කර දෙකක් ගිහින් තියෙනවා. අපිට මැණික් ලැබුණා කියලා ආරංචිය පැතිරිලා ගියාට පස්සෙ මිනිස්සු ලයිසන් අරගෙන මුළු වත්තෙම පතල් හෑරුවා. තව සමහර අය හොරෙන් පතල් කැපුවා. ඒ සමහර පතල්වලින් නිල් පාට ගල් ලැබිලා තිබුණා. ඒත් පතලෙන් උඩට අරගෙන හොඳට හෝදලා බලනකොට ලූණු කැට වගේ පොඩි වෙලා ගිහින්. එහෙම කුඩු වෙලා යන ගල් අපිත් දැකලා තියෙනවා. අපිට ලැබුණු මැණික් ගල් ටික හැරෙන්නට මදටියා ඇටයක තරමේවත් මැණික් ගලක් යෝගගේ වත්තෙන් වෙන කිසිම කෙනෙකුට ලැබිලා නෑ. අපේ හැඟීම නම් අපිට ලැබුණේ නිධානයක් කියලයි. ලොකු අයියට හීනෙන් කියපු නිධානය ඕක තමයි. ඒත් දෙයියො දුන්නු නිධානයෙන් අපිට ඵල ප‍්‍රයෝජනයක් ගන්න බැරි වුණා. තාත්තා හදිස්සි වෙලා ගෙදරින් එළියට ගල අරගෙන ගියාට පස්සෙ නැවත අපේ ගෙදරට ගල ආවේ නෑ. ඒ කාලෙ හැටියට මැණික් ගල් ටික විකුණපු ඇත්ත ගාන අදටවත් අපි දන්නෙ නෑ.

තාත්තට ලක්‍ෂ දාහතක් දීලා තිබුණා. තාත්තා ඒ සල්ලි අපේ සහෝදර, සහෝදරියන්ට බෙදා දුන්නා. මැණික් ගල් ටික ලැබුණු ඉඩමේ අයිතිවාසිකම් කියාගෙන ඇවිත් තව කිහිපදෙනෙක් තාත්තාගෙන් සල්ලි ඉල්ලගෙන ගියා. මම පොඩි එකා නිසා රුපියලක්වත් මට ලැබුණේ නෑ. අපි ජීවත් වුණු මැටි ගේ වෙනුවට සිමෙන්ති ගඩොලෙන් හොඳ ගෙයක් නම් හදාගත්තා. පස්සෙ තමයි අපිට ආරංචි වුණේ තාත්තලා විකුණපු ලොකුම ගල කිලෝ හතළිස් පහක් බර නිල් මැණිකක් කියලා. ඒ මැණික් ගල් පොකුරෙ තිබුණු තරමක් ලොකු ගලක් අපේ ගෙයි මුල්ලක දාලා තියෙනකොට ගමේ කෙනෙක් අරගෙන ගිහින් කොරසම ඇරලා බලනකොට නිල් මැණිකක් තිබිලා තියෙන්නෙ. ඒ මැණිකෙ බරත් කිලෝ හයක්. ඒ මනුස්සයා ඒ මැණික විකුණලා අද කෝටිපතියෙක් වෙලා ඉන්නවා. ඒත් නිධානය ඒ මැණික් නිසා අපිට, අපේ ඔප්පු තිරිප්පු ටිකත් නැති වුණා…’’

‘‘මැණික් ගල විකුණලා අක්කලාගේ ගෙදර නතර වෙලා ඉන්නකොට ගමේ මිනිස්සු අපේ ගෙට පැනලා තව මැණික් ඇති කියලා හිතලා ටන්කා පෙට්ටි පිටින් උස්සගෙන ගිහින්. මැණික් නැති නිසා ඒ පෙට්ටි විසි කර දාලා. පෙට්ටිවල තිබුණු ලියකියවිලි අදටත් අතුරුදන්. අතට ලැබුණු නිධානයෙන් අන්තිමේ අපිට වුණේ විශාල පාඩුවක්. ඒ මැණික් ගල්වල ඵල ප‍්‍රයෝජන ගත්තෙ කෝටිපති ව්‍යාපාරිකයෙක්. අදටත් ඒ මිනිස්සු අපේ මැණික්වලින් මුදල් උපයනවා. ඒත් අපිට අබමල් රේණුවක තරම් උපකාරයක් කරලා නෑ. අඩුම තරමින් අපේ තාත්තා, අම්මටවත් කිසිම දෙයක් දීලා නෑ. ඒ වුණාට අපේ මැණික විකිණීමට කපුකම කරපු දේශපාලනඥයාට නම් තවමත් මැණික් මුදලාලි සලකනවා කියලා ආරංචියි. අපේ නිධානය අරගෙන ඒ මිනිස්සු අදටත් සුරසැප විඳිනවා. අපි තවමත් දුක්විඳිනවා. මේ ඉන්නෙ මගේ ලොකු අක්කා. බලන්න හැටි. තවම කඩවල දුක්විඳිනවා. අපේ පවුලට ලැබුණු නිධානය හරියට මිල කර ගත්තා නම් මේ කොල්ලො ලිප් ළඟ ගින්දර කන්නෙ නෑ…’’ තේ කඬේ වඬේ බදිමින් සිටි තරුණයකු පෙන්නා ආරියදාස එසේ කීවේය.

ඒ ආරියදාසගේ අක්කාගේ බාල පුතාය. එම තේ කඩය කරගෙන යන්නෙ ඔහුය. අම්මා පුතාගේ සහායට කඬේ වැඩ කරන්නීය. ‘‘මමත් ගල උස්සන්න හැදුවා. මට හොල්ලන්වත් බැරි වුණා. අපේ තාත්තයි, මගේ මහත්තයි ගිහින් තමයි ගල විකුණලා තිබුණේ. අපි ළඟ තව ගලක් තියෙනව කියලා දැනගත්තට පස්සෙ අපිට වෑන් එකකුත් අරගෙන දුන්නා. ඊට පස්සෙ ඒ ගලත් අර මුදලාලිටම දුන්නා. අපේ මහත්තයා සල්ලි අතට ආවහාම සුද්දෙක් වුණා. වත්තෙ මුර ජොබ් එකත් නතර කරලා ඒ සල්ලිවලින් කලා බීලා විනෝද වුණා. සල්ලි ඉවර වීගෙන යනකොට වෑන් එක විකුණලා බස් එකක් ගත්තා. ඒ බස් එකෙන් තවත් එරුණා. අන්තිමේ බස් එක ෆිනෑන්ස් එකෙන් උස්සගෙන ගියා. අපි හිටපු තැනටම වැටුණා. මේ කඬේ දාගත්තෙත් දරුවො මහන්සි වෙලා…’’ ඒ කතා කළේ ආරියදාසගේ ලොකු අක්කා කමලාවතීය. වයස අවුරුදු පනස් නවයක් වන ඇය සැප කියන වචනයවත් අසා නැති තරම්ය. ඒ තරමටම ඇය දුක්විඳි කාන්තාවක් බව ඇයගේ වැහැරුණු ශරීර කූඩුවෙන් පෙනේ.

‘‘පින්තූර ගත්තට පත්තරේ නම් දාන්න එපා. ඒක අපේ දරුවන්ට හොඳ නෑ. මිනිස්සු කියයි මේ මහා අවාසනාවන්ත ළමයි කියලා. මැණික් ගල් ටිකට වෙච්ච දේ දන්නෙ අපි විතරයි. ලෝකයේ වටිනාම මැණික විකුණපු අපේ තාත්තාගේ මරණයටත් ගල ගත්ත මුදලාලි ආවේ නෑ…’’ අරියදාස කමලාවතීගේ කතාව අතරට පැන්නේය. ‘‘රටේ මිනිස්සු හිතාගෙන ඉන්නෙ කෝටි ගණන් සල්ලි ලැබිලා අපි ඒ මුදල් නැති නාස්ති කරගෙන අයට වැටිලා කියලා. අපිට ලැබුණු නිධානයට වෙච්ච දේ ගැන දන්නෙ අපේ පවුලෙ අයයි, උඩ ඉන්න දෙවිවරුයි විතරයි. මම කියපු දේ අහලා තාත්තා හදිස්සි නොවී හිටියා නම් මැණික් ගල් ටික නියම වටිනාකමට විකුණලා අපේ මුළු පවුලම ගොඩ දාගන්න තිබුණා…’’ ආරියදාසගේ මුවින් ඒ වචන පිට වන විට හිතේ පුංචි හෝ දුකක් නැති බව ඔහුගේ මුහුණේ ඇඳෙන හසරැල්වලින් අපට පසක් විය. අල්පේච්ඡු ජීවිතයක් ගත කරන ආරියදාස ලැබෙන දෙයින් උපරිම සතුටින් ජීවත් වන බව ද ඔහු අපට කීවේය. එහෙත් කමලාවතී කතා කරන විට දෙනෙත් බොඳ වී යන අයුරු අපට පෙනිණි.

ලොව වටිනාම මැණික් ගලේ උරුමක්කරුවන් ඔවුන් වුවද එහි හිමිකාරිත්වය සහ ඵල ප‍්‍රයෝජන ලබන්නට ඔවුහු වාසනාවන්ත නොවූහ. අදටත් එම මැණිකෙ ඵල ප‍්‍රයෝජන භුක්ති විඳින්නෙ කෝටිපති මැණික් ව්‍යාපාරිකයෙකි. ඒ ඔහුගේ වාසනාවය. එහෙත් ව්‍යාපාරික චේතනාවෙන් ඔබ්බට ගොස් මනුෂ්‍යත්වයේ නාමයෙන් ඒ මැණිකෙ උරුමක්කරුවන්ට සැලකීම මනුස්සකමය. එහෙත් ඇතැම් ව්‍යාපාරිකයන් ළඟ නැතිම දේ මනුස්සකමය.